అమ్మమ్మా! నాకు అప్పచ్చులు చేసి పెట్టవా!
బామ్మా! నాకు మామిడి తాండ్ర పెట్టవా!
తాతయ్యా! నాకో కథ చెప్పవా!
అత్తా! నన్ను గుడికి తీసుకువెళ్లవా!
బాబాయ్‌! నన్ను చెరువు దగ్గర ఉన్న పార్కుకి తీసుకెళ్లవా!
వేసవి కాలం వస్తే ఇటువంటి పిలుపులు బాగా వినిపించేవి.
ఇప్పుడు వేసవి సెలవులు వచ్చాయంటే ఏవో కోర్సుల్లో చేరిపోతున్నారు పిల్లలు. ఒకవేళ ఇంట్లో ఉన్నా, వీడియో గేమ్స్, టీవీ, కంప్యూటర్‌కి అతుక్కుపోతున్నారు.
––––––––––––––––
బాల్యంలో మధురక్షణాలుగా చెప్పుకోవలసినవి అమ్మమ్మ, నాయనమ్మలతో గడిపే క్షణాలు. ఆ మధురక్షణాలను వీడియోగా తీసి అప్‌లోడ్‌ చేశారు ఒక నాయనమ్మ. రెండు నిమిషాల నిడివి ఉన్న ఆ వీడియోను రాజ్‌ అనే ట్విటర్‌ యూజర్‌ ట్విటర్‌లో షేర్‌ చేశాడు. పెట్టిన పది గంటలకే ఆ వీడియోను మూడు లక్షలకు పైగా చూశారు. తన మనవరాలు సంబరంగా చూస్తుంటే, ఆ నాయనమ్మ ఐదురాళ్లతో గచ్చకాయలను అవలీలగా నవ్వుతూ ఆడుతున్నారు. ఈ పోస్టుకి ‘పిల్లలు అమ్మమ్మనాయనమ్మలతో ఎందుకు కాలం గడపాలి’ అని క్యాప్షన్‌ పెట్టారు రాజ్‌. ఈ ట్వీట్‌ చూసినవారిలో ఒకరు, ‘నేను మా అమ్మమ్మతో చాలా బాగా ఆడుకున్నాను. ఈ వీడియో చూసి నా బాల్యం గుర్తు చేసుకున్నాను. నాకు ఆనందం కలిగించిన ఈ వీడియో షేర్‌ చేసినందుకు చాలా థాంక్స్‌’ ట్వీట్‌ చేశారు. ‘అమ్మమ్మనాయనమ్మలను జాగ్రత్తగా చూసుకోండి. వారు మనకు ప్రకృతి ప్రసాదించిన అందమైన బహుమతి, ఇటీవలే మా అమ్మమ్మ కాలం చేసింది’ అని మరొకరు చాలా బాధ్యతగా ట్వీట్‌ చేశారు.
గతంలో...
సుమారు 20 సంవత్సరాల క్రితం వరకు, పిల్లలకు ఏ సెలవులు వచ్చినా తాతయ్య ఇంటికి వెళ్లిపోయేవారు, అక్కడ అందరితో ఆడుకుంటూ, మధురజ్ఞాపకాలను పోగు చేసుకునేవారు. ముఖ్యంగా అమ్మమ్మ పెట్టిన మినపసున్నుండలు, నాయనమ్మ తినిపించిన గోరుముద్దలు, తాతయ్యలు చెప్పిన కథలు.. రెండు నెలలు రెండు క్షణాలుగా గడిచిపోయేవి పిల్లలకు. అసలు కంటె వడ్డీ ముద్దు అనే సామెత ఉండనే ఉంది. తాతయ్య, నాయనమ్మ, అమ్మమ్మలు మనవల రాక కోసం ఎదురుచూస్తుండేవారు. వారు వస్తున్న కబురు రాగానే, ఇంటి నిండా పిండి వంటలు సిద్ధం చేసి ఉంచేవారు. పిల్లలు ఆడుకుంటూ, మధ్యమధ్యలో వచ్చి, ‘అమ్మమ్మా! ఆకలి’ అనగానే ఒక సున్నుండ పెట్టేది అమ్మమ్మ.
ఆటపాటలు...
కేవలం చిరుతిళ్లు మాత్రమే కాదు, పిల్లలతో ఎన్నో ఆటలు ఆడేవారు అమ్మమ్మలు. పిల్లల చేతులన్నీ ఒక చోట చేర్చి, ‘తారంగం తారంగం తాండవ కృష్ణా తారంగం, వీరీ వీరీ గుమ్మడి పండు వీరీ పేరేమీ, చింతగింజలు, గచ్చ కాయలు, పచ్చీస్, దూదుం పుల్ల... ఇలా ఎన్నో ఆటలు వారితో ఆడుతూ, వారికి విజ్ఞానం పంచేవారు. కూడికలు, తీసివేతలు, గుణకారాలు, భాగహారాలు, పోతన భాగవతంలో పద్యాలు, సుమతీ శతకం, వేమన శతకం... ఇలా అమ్మమ్మ, నాయనమ్మల ఇల్లు విజ్ఞాన భాండాగారంలా ఉండేది.
ప్రస్తుతం...
చాలాకాలం తరవాత ఇప్పుడు ఒక బామ్మ తన మనవరాలిని పక్కన కూర్చోపెట్టుకుని, గచ్చకాయలలో రకరకాల ఆటలను ఆడుతుంటే, ఆ పసిపిల్ల కల్మషం లేకుండా స్వచ్ఛంగా కడుపునిండుగా, కడుపు పగిలేలా నవ్వుతోంది. ఆట ఆడుతూ బామ్మ చేస్తున్న శబ్దాలకు హాయిగా నవ్వుతోంది మనవరాలు. అంత చిన్న మనవరాలికి గచ్చకాయలు ఆడటం రాదు. కాని ఆ బామ్మ మాత్రం చంటిపిల్లకు అర్థమయ్యేలా ముద్దుముద్దుగా మాట్లాడుతూ ఆడటంతో చాలా చక్కగా ఎంజాయ్‌ చేసింది. గచ్చకాయలతో మరిన్ని ఆటలు ఆడిన వీడియో ఇప్పుడు బాగా వైర‌ల్ అవుతోంది.
No comments:
Post a Comment