పాట మేధావి

బుడతడి ప్రజ్ఞ వెనుక నాన్న

జిబిగ్‌న్యూ (బుజ్జి) కి తెలుగు మాట్లాడటంరాదు..

తెలుగు చదవటం రాదు

తెలుగు పదాలకు అర్థం తెలియదు.

తెలుగు పాట మాత్రం ఉచ్చారణ దోషాలు లేకుండా భావయుక్తంగా పాడగలడు..

మొత్తం తొమ్మిది భాషల్లో ఈ బుడతడు ఇలా రాగయుక్తంగా పాడేస్తుంటాడు.

ఈ బుజ్జిగాడు నోట వచ్చిన ప్రతిపలుకుని నేర్చుకుంటూనే పాటలు పాడేస్తున్నాడు.

బుజ్జిగాడికి పాటలు నేర్పటం మొదలుపెట్టారు తండ్రి 

బుజ్జిగాడిలోని ప్రతిభను ఏ విధంగా గుర్తించారో సాక్షికి వివరించారు లండన్‌లో నివసిస్తున్న చరట్లూర్‌ శరత్‌చంద్రకాంత్‌.

––––––––––––––––––––

మేం హైదరాబాద్‌ వాస్తవ్యులం. దేశదేశాలు తిరుగుతూ, పోలాండ్‌లో ఒక కంపెనీ మేనేజర్‌గా పనిచేస్తున్న ఉర్స్‌జులాను వివాహం చేసుకున్నాను. మాకు ఒక బాబు. జిబిగిన్యూ ఆచార్య అని పేరుపెట్టాం. బుజ్జి అని ముద్దుగా పిలుచుకుంటాం. బాబుకి రెండున్నరేళ్ల వయసున్నప్పుడు కార్లను గురించి చెబితే గుర్తు పెట్టుకుని, బయట ఏ కారు కనిపించినా ఆ బ్రాండ్‌ పేరు చెబుతుండేవాడు. ఆ తరవాత 202 ప్రపంచ దేశాల రాజధానులు నేర్పించాను. అడగ్గానే చెప్పేవాడు. వాటిని సోషల్‌ మీడియాలో అప్‌లోడ్‌ చేశాను. అలా జనరల్‌ నాలెడ్జితో మా బుజ్జి బాగా ఫేమస్‌ అయ్యాడు. 

ఆ రోజు...

ఐదేళ్ల వయసులో ఒక స్పానిష్‌ పాట పాడాడు. అప్పటికి వాడికి స్పానిష్‌ తెలియదు. వెంటనే ‘శుక్లాంబరధరం’ శ్లోకం నేర్పించాను. 20 నిమిషాలలో రాగయుక్తంగా పాడాడు. మన జాతీయ గీతం ‘జనగణమణ’ రెండు సార్లు నేర్చుకుని వెంటనే పాడేశాడు. ఇలా ఏ పాట నేర్పినా అరగంటలో ఉచ్చారణ దోషాలు లేకుండా పాడటం గమనించాను. ఒకసారి నా స్నేహితులు హైదరాబాద్‌ నుంచి లండన్‌ మా ఇంటికి వచ్చినప్పుడు మా అబ్బాయి పాటలు విని, రికార్డు చేసి, సోషల్‌ మీడియాలో పోస్ట్‌ చేశారు. అలా పిల్లవాడు ప్రపంచానికి పరిచితుడయ్యాడు. ఆ తరవాత యూట్యూబ్‌ చానల్‌ ప్రారంభించి మా బుజ్జిగాడి పాటలు అప్‌లోడ్‌ చేయటం మొదలుపెట్టాను. పిల్లవాడి పాటలు చూసిన సినీ, సంగీత ప్రముఖులు పిల్లవాడిని ప్రశంసలతో ఆశీర్వదించారు. బాలు, కోటి, కమల్‌హాసన్, శంకర్‌మహదేవన్, చంద్రబోస్‌ వంటి పెద్దల ఆశీర్వాదం నాకు చాలా సంతోషం కలిగించింది. మా బుజ్జిగాడు సుమారు రెండు వందల తెలుగు పాటలు నేర్చుకున్నాడు.

ఇలా నేర్పిస్తాను...

పాట ముందుగా నేను నేర్చుకుని, ఆ తరవాత బుజ్జిగాడిని నేర్పుతాను. ఆ తరవాత ఒరిజినల్‌ సాంగ్‌ ప్లే చేసి వినిపిస్తాను. ‘పాట నేర్పుతాను’ అనగానే వెంటనే నేర్చుకుని, పాడేస్తాడు. పెయింటింగ్,. కీబోర్డు, వెంటిలాక్విజమ్‌ కూడా చేస్తున్నాడు. స్కూల్‌ ఎంట్రన్స్‌కి కూడా కూచోబెట్టి చదవమని చెప్పలేదు. వెస్ట్‌మినిస్టర్‌ స్కూల్‌లో 30 సీట్ల కోసం 90 వేల మంది పరీక్ష రాస్తే, అందులో సెలక్ట్‌ అయ్యాడు. ఇదే స్కూల్లో కంటిన్యూ  అయితే, ఆక్స్‌ఫర్డ్‌లో సీటు వస్తుంది. బాబు ఇప్పుడు ఏడో తరగతి చదువుతున్నాడు.  

చెన్నైలో ఉంటున్న ర‌మేశ్ రూపొందించిన సంగీత చ‌క్రం కూడా నిరీక్షిస్తున్నాడు. ఆ చ‌క్రం స‌హాయంతో ఒకేసారి భార‌తీయ‌, పాశ్చాత్య రాగాల‌ను సులువు నేర్చుకోవాల‌నే కుతూహలంతో ఉన్నాడు.

నా బాధ్యత...

ఎప్పుడు ఎక్కడ ఏది ప్రమోట్‌ చేయాలో, అది ఒక తండ్రిగా నేను చేస్తున్నాను. లవకుశ చిత్రంలోని రామసుగుణధామా... పాడుతుంటే కళ్లలో నీళ్లు వస్తాయి. ఈ పాటను రోజుకు అరగంట చొప్పున ఐదు రోజులు నేర్పించాను. ఇప్పుడు పాండురంగ మహాత్మ్యంలోని ‘జయకృష్ణా ముకుందా మురారీ’ పాట నేర్పుతున్నాను. పాటను ఇంగ్లీషులో రాసుకుని, నాలుగేసి లైన్ల చొప్పున నాలుగు సార్లు చెబితే పాడుతున్నాడు. ఆ నాలుగు లైన్లు పాడటం వచ్చాక, మరో నాలుగు లైన్లు నేర్పుతున్నాను. 

– చరట్లూర్‌ శరత్‌చంద్రకాంత్‌